Litla fólkið í Háagerðinu

Halló, halló og sorry fyrir að hafa verið svona löt að skrifa en það eru sko góðar ástæður fyrir því.
Best er byrja á byrjuninni:
Föstudagur: Guðrún Gísla., kennarinn hans Egils, kom snemma dags og heimsótti Egil og hans samstarfsmenn. Á meðan fór ég í atvinnuviðtal á vegum skólans hjá stofnun sem heitir Aberdeen Carers Centre. Ég var sem sagt ráðin á staðnum og verkefnið mitt verður að hanna vefsíðu fyrir þá sem inniheldur upplýsingar fyrir foreldra sem eiga börn með "special needs". Þetta verður örugglega fínt. Nú eftir það fór ég í skranbúðina mína og keypti kommóðu á 5 pund. Svo verslaði ég í matinn og tók leigubíl heim. Ég var meira að segja svo skipulögð að ég var búin að elda kvöldmatinn klukkan þrjú og svo lagði ég mig. Svo komu Guðrún og Egill heim um sex leytið og við notuðum tímann þar til að ég var búin að hita upp lasagnað og ræddum um ferðalag morgundagsins. Snemma að sofa.
Laugardagur: Við vorum vöknuð um hálf níu og borðuðum egg og beikon í morgunmat. Svo lögðum við af stað í svakalegt ferðalag. Við keyrðum frá Aberdeen og inn dalinn meðfram ánni Dee. Næst beygðum við inn í Kairngorn mountains og yfir fjallgarðinn og inn í Spey-side dalinn. Við borðuðum hádegismat í litlum bæ sem heitir Aviemore og héldum áfram í áttina að Loch Ness. Þar keyrðum við meðfram öllu vatninu þar til um miðja vegu rákumst við á kastala sem heitir Urquart. Þar stoppuðum við enda útsýnið magnað yfir vatnið og kastalinn (eða rústirnar) alveg rosalega flott. Síðan héldum við áfram í áttina að bænum Inverness og svo heim á leið. Allt í allt keyrðum við í 12 klukkutíma en það var svo margt fallegt að sjá að maður tók eiginlega ekki eftir því.
Sunnudagur:Eftir örlítið hollari morgunmat heldur en daginn áður fóru Guðrún og Egill að skoða Dunnottar kastala sem er rétt við Stonehaven. 'Eg ákvað að fara ekki með enda leið mér ekki alveg vel í maganum. Það var svo sem rétt ákvörðum því eftir að hafa engst um í rúminu í tvo klukkutíma fóru hlutirnir að gerast og óhætt er að segja að verri magakveisu hef ég ekki fengið síðan ég var krakki. Þetta gerði það að verkum að ég var rúmliggjandi (verulega kvalin) allan sunnudaginn og langt fram eftir kvöldi. Egill og Guðrún komu heim um þrjú leytið og skelltu sér síðan á götumarkað sem var haldinn í miðbæ Aberdeen. Svo komu þau heim og elduðu sér kvöldmat og Egill keyrði svo Guðrúnu í lestina rétt fyrir klukkan átta. En ég var sem sagt ekki búin að jafna mig þá og Egill gisti í rúminu hennar Eydísar til að leyfa mér að vera í friði.
Mánudagur: Já, dagurinn í dag er búin að vera frekar slappur enda minna sofið heldur en oft áður. Ég fór þó samt í vinuna enda ekki hægt að tilkynna sig veikan á fyrsta degi. Reyndar var ég svo slöpp að ég fékk að fara fyrr heim. (Enda í lagi því að konan sem að átti að sjá um mig var ekki við allan daginn). Ég fór því heim og ákvað að taka því rólega.

Svona eru semsagt dagarnir búnir að vera hjá okkur hjónunum. Frekar rólegt. Framundan eru miklir vinnudagar, ritgerðarskrif og flutningar. Gaman, Gaman.

Jæja - ætla að fara að sofa
Kv. Ragna

posted by Ragna @ 9:06 e.h.