Litla fólkið í Háagerðinu

Nú er þriðja helgin liðin hér í Aberdeen. Eydís er enn með smá sýkingu í auganu en við erum loksins farin að sjá batamerki á auganu. Sjálf er hún annars hress og til í tuskið.
Á laugardaginn hringdum við í Rannveigu og Berg og spurðum þau hvort þau vildu koma með okkur í keilu. Þau voru til í það og um tvöleytið kom hersingin og við trömmuðum af stað niður á strönd. Eftir kortersgöngu vorum við komin á áfangastað sem heitir því fallega nafni “Miami Beach”. Þetta er minikomplex þar sem hægt er að finna alls konar skemmtun fyrir krakkana. Úti eru rússíbanar og hringeggjur en inni er risastór spilasalur, keila og klessubílar. Við helltum okkur í að spila keilu þrátt fyrir dómsdagshávaða í mússíkerfi staðarins og óskaplegs hita. Eftir rúman klukkutíma og tvær bilanir gáfumst við upp og færðum okkur um set. Egill og Eydís fóru einn hring í klessubílunum á meðan að Alexander og Benedikt fóru í byssuleik. Þegar heim var komið pöntuðum við Dominos pizzu sem reyndist bara vera ágæt. (Mér skilst að pizzurnar í Aberdeen séu hræðilega vondar.)
Á sunnudagseftirmiðdaginn kom Benedikt í heimsókn og fékk síðan leyfi til að gista hjá okkur. Eydís var hrikalega spennt yfir því að einhver væri að fara að sofa í efri kojunni hennar. Þau ná ótrúlega vel saman þrátt fyrir árs aldursmun. Sem dæmi um það léku þau í prinsessuleik allt kvöldið, bæði klædd í kjóla og í spariskóm.
Í morgun vaknaði hersingin klukkan hálf átta og heimtaði hafragraut. Rannveig kom í hádeginu og við fórum öll í göngutúr niðrí bæ. Á leiðinni rak ég augun í forláta tóbaksbúð sem seldi neftóbak. President neftóbak fæst í Aberdeen á 153,- kr. dollan. Aðalmarkmiðið var samt sem áður að fara í tourist information til að fá bæklinga um hluti sem hægt er að gera í nágrenni Aberdeen. Eins og okkur grunaði þá er ýmislegt skemmtilegt hægt að gera og fundum við meðal annars makalaust girnilega ferð þar sem boðið er upp á wisky smökkun hjá Glenfidich. Einnig fundum við stað þar sem hægt er að leigja bústaði og veiða. (Frekar flott)
En núna er komið páskafrí í leikskólanum þannig að við Eydís verðum heima að dunda okkur næstu dagana. Reyndar ákváðum við Rannveig að fara með krakkana í bíó á miðvikudaginn og verður forvitnilegt að sjá hvernig Eydís bregst við því að fara á útlenska bíómynd.
Jæja, nú var “Men in black” að byrja í sjónvarpinu og við Egill ætlum að kúra okkur í litlu sófana okkar og horfa á hana.
Skrifa bráðum meira. :-)

posted by Ragna @ 7:41 e.h.