Litla fólkið í Háagerðinu

Egill skrifar

Jæja, það er víst orðið svolítið langt síðan síðast, svona gengur þetta víst. Alntént, tíminn líður hratt og sumarið komið á skrið, alla vega hér í Abbó í Skotó. Hér hefur ríkt slík einmuna blíða að elstu skotar muna vart slíkt. Rétt er þó að geta að fremur gamall skoti er nú tæplega eldri en miðaldra íslendingur. Hér hafa gráður á selsíus leikið á bilinu 15 til 20 og yfirleitt fremur stillt og bjart. Okkur hefur þó verið lofað að þetta komi ekki til með að vara mjög lengi. Skotarnir virðast haldnir sömu hyggju og oft hefur verið tengd íslenskum bændum, nefnilega að sökkva í þunglyndi í góðu veðri sökum kvíða af komandi komandi hörmungum.

Hér var haldið íslenskt júróvisjónpartí sem lukkaðist bara alveg bærilega. Alls mættu xx manns að heimilisfólki meðtöldu. Ekki komust allir sem vildu, Bergur kaus að fara í aðgerð vegna kviðslits og þiggja fáeina skammta af morfíni fremur en veigar þær sem hér voru í boði. Reyndar var nú kominn tími á þetta hjá honum enda nánast kominn í keng vegna þessa. Annars var samdóma álit að íslenska lagið hefði átt að fá mun fleiri stig og að sigurlagið teldis á mörkum þess að vera tónlist. Þetta fór þó í heildina merkilega siðsamlega fram, jafnvel þó Ragna hafi framreitt sína vafasömu hlaupsnafsa.

Magnús bauð þriggja manna stórfjölskyldunni með sér í veiðiferð í silungstjarnir nokkru utan Banchory, nágrannabæjar Aberdeen. Þetta var ágætir dagur, gott veður og huggulegt umhverfi. Þarna er bara leyfð fluguveiði utan þess sem þarna er lítil tjörn, mjög lítil reyndar, gæti hafa verið svona um 10 fermetrar, sem er kölluð beitutjörn og er aðallega ætluð börnum. Hugsanlega var þar einn fiskur. Ekki veiddu fjölskyldumeðlimir nokkurn skapaðan hlut en Magnús fiskaði upp eina fjóra regnbogasilunga sem hann síðan steikti upp á “vestfirska” vísu. Það þýðir að þeir eru pönnuskteiktir upp úr sykri.

Ragna skrifar

Helgina 7-8 júní var ákveðið að gera börnin ánægð og fara á leikvöll nálægt ströndinni. Þar var setið við í drjúga stund en síðar röltum við að tívólíinu þar sem börnunum var komið fyrir í geymslu á meðan að fullorðna fólkið drakk kaffi. Síðan var ákveðið að halda grillveislu hjá Magnúsi og Hafdísi. Þar mættum við ásamt Rannveigu og Bergi og strákunum þeirra. Eins og undanfarið lék veðrið við okkur þannig að við sátum úti í garði og borðuðum. Síðan voru spilaðir nokkrir leikir af billjard (inni í bílskúr) og þegar fór að kólna færðum við okkur inn og spiluðum tíu þar til að mál var að fara með börnin heim.

Nú.. Egill er á leiðinni til Íslands fyrir þá sem ekki voru búnir að frétta. Hann er að koma heim í námsferð og mun sennilega ferðast hringinn í kringum landið með vinnufélögunum. Þar munu þeir grafa upp mold til að flytja með sér heim. Hann kemur heim til Íslands þann 19. júní og kemur aftur út þann 3. júlí.
Við Eydís komum svo heim þann 16. júlí og Egill kemur aftur þann 29. júlí. Við förum svo öll saman "heim" þann 29. ágúst. Jæja - þá vita allir af ferðaplönunum okkar.

En við lofum að skrifa meira í náinni framtíð og biðjum að heilsa í bili
Egill og Ragna

posted by Ragna @ 4:53 e.h. 1 comments